හැමදාමත් වෙනස් වන අපේ හිත්වල පුංචි පුංචි බලාපොරොත්තු තියෙනවා . පුංචිම කාළෙ නම් අම්මට තුරුල් වෙලා බඩ පිරුණත් තව ටිකක් කිරි බොන්න , ඒ උණුහුමේ හැංගිලා ඉන්න , ඊට ටිකක් ලොකු වෙන කොට තාත්තත් එක්ක රේස් පැදල , තරඟෙට දුවල දිනන්න , තව ටිකක් කල් ගියාම ඉස්කෝළෙ , පන්තියේ හොඳ තැනක් ගන්න ...ඔහොම කියාගෙන යත්දි කොයි තරම් නම් බලාපොරොත්තුද ? ...අපි ජීවත් කරවන නොපෙනෙන බලවේගය මේ බලාපොරොත්තු කියලයි අපි හැමෝම දන්න විදිය ,
ඔව් එහෙම නම් මේ බ්ලොග් සටහන වෙන කරන්නේම එවන් බලාපොරොත්තුවක් ඉටු කරගන්නට පෙරුම් පුරන ,ඒ වෙනුවෙන් සුදානම් වන්නට පෙර මග බලා හිඳින අපේ ශ්‍රී ලාංකික මිතුරු මිතුරියන්ට හැකි පමණින් යම් සහයෝගයක් ලබා දෙන්නටමයි . අපි මේ කතා කරන්නට හදන ඒ බලාපොරොත්තුව තමා කැනඩාවට සංක්‍රමණය වීම කියන දේ. ඔව් ..ඔබ දැනටමත් මේ ගැන දන්නව ඇති ,සමහර විට මේ ගැන විස්තර සොයාගෙනත් ඇති , නැත්නම් කාගෙන අහන්නද කියල හිත හිතා ඉන්නව වෙන්නත් ඇති .
එහෙම නම් මේ ඔබ වෙනුවෙන් වෙන් වන “කැනඩාවට එන්නට මඟ“ බ්ලොග් සටහනයි ..විශේෂයෙන්ම කියන්නට ඕන මෙය කිසිම වාණිජ අරමණක් ඇතිව පවත්වාගෙන යන්නට සූදානම් බ්ලොග් අඩවියක් නොවේ . නැතිනම් යම් විදේශ සංක්‍රමණ උපදේශකවරයෙක්ගේ Immigration consultant උපකාරයට අනුග්‍රහයට කෙරෙන්නකුත් නොවේ , ඒ නිසා මේ කිසිම සටහනක කිසිදු එම ආයතන වල වාණිජ නාම , අංක හෝ එබඳු තොරතුරු ලබා දීමක් කෙරෙන්නේ නැහැ. මේ තොරතුරු බොහොමයකට පාදක කරගන්නේ කැනඩා රජයේ සංක්‍රමණික තොරතුරු සහ අනුබද්ධ පිළිගත්ත කරුණූ පමණයි. සමහර විටෙක මෙ ගමනේදි අප ලද අත්දැකීම් , වැරදීම් වගේම උගත්දෑත් මේ සටහන් වලට එක්වෙන්ට ඉඩ තිබේවි.
කෙසේ වෙතත් , රට යන්න උපදෙසක් ගන්නත් රැපියල් පනස්දාහක් විතර ගෙවන්න වෙන , එහෙම නැත්නම් පෝරම ටික පුරවල තැපෑලට දාල වීසා එන්කම් බලා ඉන්නට රුපියල් වලින් ලක්ෂ පහක් හතක් ගන්න අවස්ථාවක , ඒ සියළු තොරතුරු නොමිලේම දෙන්න උත්සාහ දරණ මේ සටහනට මල් වගේම ගල් ආවොත් එය මා කැමැත්තෙන් පිළිගන්නවා , මොකද විශේෂයෙන්ම හැමදේම මුදලට විකිණෙන ලෝකෙක , සල්ලි නොගෙන කෙරෙන දේ “මෝඩ වැඩක් , නැත්නම් ප්‍රයෝජනයක් නැති “ දෙයක් විදියට සලකන්නට ඉඩ වැඩි නිසා.
කෙසේ වෙතත් ඔබ සූදානම් නම් නීත්‍යානූකූල අයුරින් කැනඩාවට සංක්‍රමණය වන්නට , විශේෂයෙන්ම කැනඩාවේ පදිංචිව , ලෝකයේ ඉහළම ජීවන තත්ත්වයක් විඳින්නට , දියුණුම තාක්ෂණයේ සුව ලබන්නට , විශේෂයෙන්ම ඔබේ දුවට පුතාට ලෝකයේ ඉහළම මට්ටමේ අධ්‍යාපනයක් ලබා ගන්නට ....මේ ඔබ වෙනුවෙන්මයි .රැඳී සිටින්න මේ බ්ලොග් සටහන සමඟින් , සියල්ල එකවර ලබා දෙන්නට නොහැකි වුනත් ටිකෙන් ටික ඔබට අවැසි සියලු දේ ලබා දෙන්නට මා උත්සාහ කරනවා . ලැබෙන විවේක සීමාවන් එක්ක හැකි තරම් ඉක්මණින් මේ කරුණූ ඔබ වෙත ගෙන එන්නට බලාපොරොත්තු වෙනවා. ඒ ගමනේදි ඔබෙන් ලැබෙන අදහස් යෝජනා චෝදනා වගේම , කැනඩාවට එන ගමනේ ඔබ මුහුණ දී ඇති ගැටළු පවා මේ බ්ලොග් සටහන වෙත යොමු කරන්නේ නම් එය ඉතා වටිනවා , එ වගේම මේ සටහන කියවන , දැනට කැනඩාවේ පදිංචිව සිටින මිතුරන්ගේ අදහස් වල මහත් වටිනාකමක් තිබෙන්නට පුළුවන් .ඒ නිසා ඔබේ ධනාත්මක යොමුවීම මගින් මේ සටහන ඉදිරියට යොමු වේවි , නොවේනම් , මෙයින් පල නෙලා ගන්නට කිසිවෙක් නැති නම් මේ බ්ලොග් සටහනත් අන්තර්ජාලයට බරක් නොවන්නට මැකී යන්නටත් ඉඩ තිබේවි .
එසේ නම් යහපත් අපේකෂාවක් පෙරදැරිව මේ ඇරඹෙන ගමනට එකවන්නට ආරාධනා ..ඒ ගමනේ යම් දිනෙක කැනඩාවෙදී ඔබ ,තවත් කැනඩා පුරවැසියෙක් ලෙසින් හමුවන්නටයි මගේ මේ බලාපොරොත්තුව ...
ස්තුතියි .. මම මහේෂ් . ටොරොන්ටෝවේ සිට
--------------------------------------------------මේ බ්ලොග් සටහනේ හැදින්විම සහ හැඳිනගැනීම ලිපිය කියවූ ඔබ දැන් දන්නව ඇති අපි මේ කතා කරන්නට හදන මාතෘකාව ගැන . නමුත් ඔබ තවමත් මුල් ලිපිය කියැවූවේ නැත්නම් , කරුණාකර එය කියවා එන්නට පුළුවන් නම් හුඟක් වටිනවා , එවිටයි අපිට මේ ගමන හරියට යන්නට පියවර තබන්නට පුළුවන් වෙන්නේ..
මේ හැම දේකම පටන් ගැනිමට ඉස්සර වෙලා කියන්නම ඕන දෙයක් තිබෙනවා , ඒ තමයි “අපිට ලෝකේ තියෙන සුන්දරම රට අපේ සිරි ලංකාව , ඒ ගැන විවාද කරන්න ඕන නැහැ “ ...ඕන වෙලාවක කටපුරා හිනාවෙලා හිත පුරා මගේ රට කියල අභිමානයක් දැනෙන්න ඉන්න පුළුවන් සිරි ලංකාවේම විතරයි , ඒ බව හොඳින්ම දැනෙන්නේ ලංකාව තුලම හිටි අයට වඩා ටික දවසකට හරි ලංකාවෙන් දුරස් වෙලා ගිය කෙනෙක්ට . ඒ හැඟිම මතක නම් , කටුනායකින් ගුවන්යානය පොළොවෙන් ඉහළට එත්දි එන හැඟීම , මේ සටහනේ ලියන්නට බැරි තරම් ....ඒ ඇත්ත අපි හැම විටෙකම පිළිගන්නවා ,
ඒත් කැනඩාව , ඔස්ට්‍රේලියාව වැනි රටකට එන්නට හැකිවීම , විශේෂයෙන්ම පදිංචිය ලබන්නට හැකිවීම තවත් වාසනාවක් , විශේෂයෙන්ම කැනඩාව බහු සංස්කෘතික රටක් නිසා වෙනත් රටකට වඩා සුවිශේෂීයී. මොකද සමහර රටවලදි අපේ ආසියාතික සමට , පාටට යම් යම් වෙනස්කම් නැතිවා නොවේ , නමුත් කැනඩාව දෙස බැලුවොත් , මුළු රටේ ජනගහණයෙන් වැඩි පිරිසක් ඉන්නේ සංක්‍රමණික පිරිස , විවිධ සංස්කෘතීන්ට multicultural society අයත් , විවිධ රටවලට අයත් පිරිසකගේ එකතුවකින් තමයි කැනඩාවේ සමස්ත ජනගහණයේ වැඩි කොටසක් සැකසෙන්නේ . ඒ නිසාම ජනවාර්ගික වශයෙන් හරි වර්ණ බේදයකින් හරි තව කෙනෙක්ට පීඩා කරන්න කිසි කෙනෙක් පෙළඹෙන්නේ නැහැ , හැම කෙනෙක්ම අනෙකාට ගරු , සැළකිල්ලකින් දවස ගෙවන්නට මේ රටේ හැම කෙනෙක්ම වගේ හුරු වෙලා ඉන්නවා .
හරි කතාව තව දිග්ගසන්නේ තැනිව ලෝකෙ පුරා බොහෝ පිරිසක් කැනඩාවට එන්නට උත්සාහ කරන්නේ ඇයි කියල . ප්‍රධානම සාධකය තමා කැනඩාව , ලෝකයේ මානව සංවර්ධන දර්ශකයේ ඉහළ තැනක සිටින රාජ්‍යයක් , International Human Development Indicators HDI ඒ තුල කෙටියෙන් කියෙවෙන කරුණූ කිහිපයක් තිබෙනවා , ඒ තමයි සෞඛ්‍ය , අධ්‍යාපනය සහ ජීවන මට්ටම කියන කරුණූ මේ සියල්ලම ඉහල තත්ත්වයක පවත්වා ගන්නට කැනඩා රාජ්‍යයට හැකිවී තිබීම ප්‍රධාන සාධකයක් . 
මේ කාරණා තවත් ටිකක් සරළව කිව්වොත් , දේශපාලනික වශයෙන් තිබෙන ඉදිරි සැලසුම්ගත බව , අපරාධ ප්‍රමාණය ඉතා අඩු මට්ටමක තිබීම , ස්වභාවික පරිසරය සෑහන දුරකට ආරක්ෂාව තිබීම වගේම , ඉහළ වැටුප් සහ ආර්ථික තත්ත්වය් හේතුවක් , ඒ වගේම ලෝකයේ ඉහළම පහසුකම් සහිත වෛද්‍ය සේවාව වගේම අධ්‍යාපන පහසුකම් මේ විදියට වැදගත් සළකුණූ තබනවා .
එහෙම නම් අපි දැන් ටිකක් කැනඩාවේ හැඩ රුව ප්‍රමාණය වගේ කරුණූ කාරණා ටිකකුත කතා කරල අපේ ප්‍රධාන මාතෘකාවට යමු .. ඒ තොරතුරු ලබා ගන්නට වැඩි දුර යන්න ඕන වෙන්නේ නැහැ , බොහොම පහසුවෙන් විකිපීඩියාවෙන් සොයා ගන්නට පුළුවන් , මෙන්න ලින්ක් එකhttp://en.wikipedia.org/wiki/Canada
එහෙම නම් ඔය විකිපීඩියා විස්තර ටිකත් කියවල එන්න , ඉතිරි වැඩ ටික පටන් ගන්නට ..ඉදිරි වැඩ කටයතු විදියට “කැනඩාවට එන්නට පෙර “ ඔබ කළ යුතු වැඩ කටයුතු , සූදානම් විය යුතු ආකාර කතා කරමු . ඒ තැනදි නිත්‍යානූකූලව එන මාවත් වගේම ඒ සඳහා ගත යුතු පියවරයනුත් එකින් එක විස්තර කරන්නට බලාපොරොත්තු වෙනවා .
දැන් ඉතින් අද ලිපිය අවසන් කරන්නට කාළෙ හරි , මේ ලිපියේ ලොකු ලොකු දේවල් ගොඩක් කතා කළේ නැහැ , අපි ටිකක් හඳුනගත්තා විතරයි , වැඩේට ඕන කරන ඔක්කොම වගේ කරුණූ , කෙටියෙන්ම කිව්වොත් වීසා ඇප්ලිකේෂන් පුරවන තැන ඉඳන් , කැනඩාවට ඇවිත් settle වෙනකම් ඕන කරන හැම දෙයක්ම ටිකෙන් ටික පියවරෙන් පියවර කතා කරන්නට අපි බලාපොරොත්තු වෙනවා . හැබැයි මේ ඔක්කොම එක දවසින් කරන්න බැරි නිසා තව දවසකින් අපි හමුවෙමු . ඒ දවස උදා වන්නට ඔබේ අදහස් යෝජනා ලොකු දිරියක් වේවි ..